Thursday, March 24, 2011

பாஸ்கர் சக்தியின் கடிதத்தைமுன்னிட்டு ஆதிரன்....

this is bad vasu. you should change this kind of attitude. i request you, please sink in fiction and get away from this cheap rate politics. i know this lines makes you angry. but this is true. people like 'priya thambi'are DOESN'T MATTER. please understand. there are lot things to do .. you know that..   please try to understand the phenomena.. and get rid of it.   ............love - mahi.




 “ இது மிகவும் மோசம் வசு, உன்னுடைய இந்தப் போக்கை மாற்றிக்கொள்ள வேண்டும். வேண்டிக் கேட்கிறேன். நீ முதலில் உன் புனைவுகளில் கவனத்தைச் செலுத்தி தரங்கெட்ட அரசியலிலிருந்து ஒதுங்கியிருக்க வேண்டும். எனக்குத் தெரியும் இந்த வரிகள் உனக்குக் கோபத்தைத் தருமென்று. ஆனால், இது உண்மை. ப்ரியா தம்பி போன்ற ஆட்கள் ஒரு பொருட்டேயல்ல, தயவுசெய்து புரிந்துகொள். நீ செய்ய வேண்டியது நிறைய இருக்கிறது. உனக்கே அது தெரியும்.

நடப்புகளைத் தயவு செய்து புரிந்து கொள். இதை விட்டொழி.

- காதலுடன் மஹி.”

மஹி நீங்கள் எழுதிய ஆங்கிலத்தின் தமிழாக்கம் இது, ஆனால் மொழிபெயர்ப்பானது வார்த்தைகளுக்கான தொனிகளை பல சமயங்களில் தரமுடியாததோடு, அவை மிகுந்த, நிச்சயமான, உணர்ச்சிகளையும் கொன்று விடக்கூடியவை என நான் நம்புகிறேன்.

வணக்கம் மஹி...,

நீங்கள் சொல்வதை நான் ஏற்றுக்கொள்கிறேன். ஆனால் அதைப் புறக்கணிக்கும் பக்குவ மனநிலைக்கு நான் இன்னும் வரவில்லை என்று நினைப்பதோடு, இது போன்ற விசயங்களில் நான் பக்குவத்திற்கு வரக்கூடாதெனவும் என்னை வணங்கி வேண்டிக் கொள்கிறேன். எனது புனைவுகளில் நான் எவ்வளவு கவனம் செலுத்துகிறேனோ அதை விட சற்று அதிக கவனமாய், இப்பூமியில் காலூன்றி நின்று யதார்த்தத்தை வாழவும் விரும்புகிறேன். எனக்கு உங்களது வரிகள் கோபத்தைத் தரவில்லை, அது என் புனைவு சார்ந்த எழுத்தின் மீதான, தாங்கள் கொண்ட அக்கறையாக இக்கணத்தில் எண்ணிக்கொள்கிறேன்.

மஹி...
புனைவின் வாயிலாக யதார்த்தங்களை கேள்வி கேட்கமுடியும், மனதின் மீள முடியா உளச்சிக்கல்களை உருவாக்க முடியும், தத்துவங்களை வார்த்தைகளால் உணர்ச்சிகரமாகக் கையாண்டு, அதன் இரக்கமில்லா முட்டாள்த்தனத்தை, வெகுளியான போக்கை வெளிக்கொண்டு வரமுடியும், ஆனால் அவைகளால் ஒருபோதும் யதார்த்த வாழ்க்கைக்கு வழிகாட்டி விடமுடியாதென்றே எண்ணுகிறேன். சிறுகதையோ, நாவல்களோ அது எதுவோ, நமக்குள்ளிருப்பதைத் தாண்டி எதையும் வெளிக்கொண்டு வந்துவிட முடியாது. அப்படி வரும் உணர்ச்சிகளையும் தத்துவம் கேள்வி கேட்கும், நமக்கான குறைபாடுகளை இலக்கியம் மிகுந்த கவனத்தோடும், சார்போடும் மன்னிக்கும். தத்துவம் அப்படியல்ல, இங்கு நான் தத்துவம் என்று குறிப்பிடுவது மேற்கூறிய தகைமைகளைக் கொண்டே.

அ. மார்க்ஸை என் நண்பனாக மட்டுமின்றி, நம் காலத்தில் வாழும் ஒரு ஆளுமையாகாவும் நான் நினைக்கிறேன். ப்ரியா தம்பி போன்றவர்களை நான் பொருட்படுத்துவதில்லை. பொருட்படுத்த வேண்டிய அவசியத்தை எனக்கு தந்தது நண்பர் பாஸ்கர் சக்தியே, ஆதிரன் எனக்கும் உங்களுக்குமான நட்பு, இலக்கியத்தில் தொடங்கி அந்தரங்கமான உறவாகவும் இருக்கிறது. ஆனால் அந்தரங்கத்தை இலக்கியத்தின்  வாயிலாக வைத்து,  நாம் ஒரு காலத்தில் மதித்துப் பேசிய ஆளுமையை, நீங்கள் இப்பொழுது தரங்கெட்ட வழியில் விமர்சித்தீர்களானால், அவ்விமர்சனத்தை நீங்கள் எனக்குப் புரிய வைக்கவேண்டும். அதனடிப்படைகளை விளக்க வேண்டும், அல்லா விட்டால், வெறும் பழக்கத்திற்கான நமது நட்பை, நாம் முழு முற்றாக விட்டொழிப்பதோடு, அதைக் குழி தோண்டி, எந்த மிருகமும் சுவாசித்துக் கண்டு பிடிக்கமுடியாதபடி, சாரமிழக்காத உப்பைப் போட்டு புதைக்க வேண்டும். இதற்கான சாத்தியப்பாடுகள் நாமிருவருக்கும் இருக்கிறது.  இது புதைப்பவனுக்கான கலை. அதை அடிக்கடி வெளிக்காட்டவேண்டும்.

மஹி....அவதூறுகளினால் அழிந்த, அழிக்கப்பட்டு, நாளும் வெளிவரும் இலக்கிய விளம்பரங்களால் தின்று கொளுத்து, தடித்த, மற்றும், ஊளைத்தனமான வரிகளை எழுதுபவர்களை நான் இன்று வரை கண்டு வருகிறேன். இப்பொழுது இலக்கியம் ஒரு சோடியம் சூடிய விளம்பரப் பலகை, கொக்க கோலாவை நடிகர் விஜய் சொன்னால் குடிப்பேன், அக்குள் நாற்ற மருந்தை நடிகை அசின் சொன்னால் அள்ளிப் பூசுவேன் என்பது போல்தான், இப்பொழுது, சில இலக்கியப் பதாகைகளும் படையெடுத்து, வார்த்தைகளை விற்பனை செய்து வருகிறார்கள். இவைகளை மறுப்பதற்கில்லை. நீங்கள் மறுத்தால் விளக்கலாம்.

மஹி...

அ. மார்க்ஸை, விமர்சித்து, அவரது சிந்தனை குறைபாடுடையது என எத்தனையோ கட்டுரைகளை  எஸ்வி.ஆர், தொடங்கி ரவிக்குமார் வரை எத்தனையோ படைப்பாளிகள், விமர்சகர்கள் எழுதியிருக்கிறார்கள். விமர்சித்தவர்களுக்கும் நான் வாசகனே. ஆனால்....

அறிந்து கொள்ளுங்கள் மஹி...
அவதூறுகளை அள்ளி வீசியவர்கள் அ. மார்க்ஸின் இலக்கியம் மற்றும் கட்டுரைகளை, மாற்றுவெளியை அறிமுகப்படுத்திய அவரின் சிந்தனைகளின் தொகைகளை, அவரின் பங்களிப்பை எத்தனை பேர் அறிந்திருப்பார்கள். ஷோபா சக்தி போன்ற ஒரு படைப்பாளியின், கட்டுரைகளையும், கதைகளையும் வாசகன் மிகுந்த நோக்கோடு வாசிப்பதோடு, அவற்றை, அவை சொல்ல மறுத்த சேதிகளை, விமர்சனங்களாக, அக்குவேறு ஆணிவேறாகக் கிழிப்பதை விட்டு விட்டு, அவர் காண்டம் வாங்கும் கணக்குகளையெல்லாம் சமர்ப்பிக்கச் சொல்லுமாறு கெஞ்சும், அட்டவணைப் பட்டியலை எழுத இடங்கொடுத்ததன் மூலம் கீற்றுவும் ப்ரியாதம்பியும் தமிழ் கூறும் நல்லுலகத்திற்கு முக்கிய பங்காற்றி வருகிறார்கள். பாஸ் ப்ரியா தம்பியை எழுத்துத்திறமை கைகூடியவர், கீற்று ரமேஷ் ஒரு புரிதல் மிக்க நல்ல மனிதன் என்று மனம் பொங்கக் கூறுகிறார். நல்லது. அவர் சொல்லுவதை நம்புவதற்கு அவரே எனக்கு வாய்ப்பளிக்கட்டும்.

மஹி... ப்ரியா தம்பி மார்க்ஸ் எழுதியதையோ, ஏன் இன்னும் மிகுந்த ஆணவத்துடனேயே கூறுகிறேன், நண்பர் பாஸ்கர் சக்தியின் கதைகளைக் கூட அவர் வாசித்திருப்பார என்பது சந்தேகம்தான்.  வாசித்திருந்தால் பாஸ்கர் சக்தியின் எழுத்துக்களைப் பற்றி ஒரு விமர்சனம் வைக்கட்டுமே, நான் பெருவுவகை அடைவதோடு, பாஸ் சொன்ன அவரின் எழுத்துத் திறமையை, நான் என் வாசிப்புத் திறமையை வீணடிக்காமல் வாசிப்பேன் என்பதைச் சொல்கிறேன்.

எண்ணற்ற படைப்பாளிகளின் கட்டுரைகளை கீற்று எடுத்துப் போடுகிறது. அதனால்தான் அதை நான் பொருட்படுத்த வேண்டியிருக்கிறது. அதற்கும் மேலாக அ. மார்க்ஸ் ரெண்டு பொண்டாட்டிக்காரர் என்று தன்னை அறிவித்து பிறகுதான் அவர் பாலியல் சுதந்திரம் பேசுகிறார் என்ற கண்டுபிடிப்பை, ப்ரியா தம்பி எழுதியது எனக்கு பொருட்டல்ல, ஆனால் ப்ரியா தம்பி தொடர்ந்து எழுத வேண்டுமென்பதை...

 “ ப்ரியாவிடம் எனக்கு எப்போதும் எவ்வித எதிர்பார்ப்புகளும் இருந்ததில்லை..ஒரே ஒரு எதிர்பார்ப்பைத் தவிர...அது அவள் தனது எழுத்து திறமையை வீணடிக்காமல் சிறப்பாக வெளிப்படுத்த வேண்டும் என்பது மட்டுமே..

 “வெகுநாட்களாக நான் சொல்லிக் கொண்டிருந்த விஷயத்தை நோக்கி ப்ரியா எடுத்து வைத்திருக்கு முதலடி இது என நினைக்கிறேன்...உன் பிறந்தநாளுக்கு நீ எனக்கு அளிக்கும் பரிசு இது ப்ரியா...தொடர்ந்து எழுதி அத்தொகுதியை எனக்கு நீ சமர்ப்பிக்க வேண்டும்...

பாஸ் இவ்வாறு ஆர்வத்துடன் வெளிப்படுத்துகிறார். ஆம்...மஹி...நான் பாஸ்கர் சக்தியைப் பொருட்படுத்துகிறேன். அ.மார்க்ஸை ரெண்டு பொண்ட்டாட்டிக்காரன், அதன் பிறகுதான் பாலியல் சுதந்திரம் பேசினான் என்று எழுதுவதற்கு, என்ன எழுத்துத் திறமைகள் வேண்டி இருக்கிறது என்று எனக்குத் தெரியவில்லை. அதோடு நான் முலை, யோனி என்ற வார்த்தைகளால் இன்னும் கிளர்ச்சியடைவதை தாண்டமுடியாதவன், அதனால்தால் அவ்வாறு பேசுகிறவன். என்ற கண்டுப்பிடிப்பை அறிந்த ப்ரியா தம்பியின் இவ்வார்த்தைகளிலாவது எழுத்துத் திறமை குடியிருக்கிறதா மஹி, விளக்குங்கள்.


எனக்கான முலையையும் யோனியையும் தீர்மானிக்க ப்ரியா தம்பி யார், இவ்வார்த்தைகளில் நான் கிளர்ச்சியடைவேன்  என்று அவரை ஊகிக்கச் செய்தது எது, எனது கவிதைகள், விமர்சனங்கள், இலக்கியக் கடுப்பேறி நான் எழுதிய கட்டுரைகள் இவைகள் எதிலாவது எனது கிளர்ச்சிக் கொந்தளிப்பைக் கண்டுபிடித்தாரா, ப்ரியா தம்பியின் அத்தனை அவதூறுகளையும் ( ஆம் அவதூறுகளைத் தவிர அவர் இதுவரை எதையும் எழுதியதில்லை, ஆனந்தவிகடனில் அவர் எழுதியதை என்னால் அதை என்றுதான் ஏற்கனவே சொல்லியிருக்கிறேன்) நான் வாசித்திருக்கிறேன், எழுத்துவிடாமல், அவரின் முகப்புத்தக வாசகங்களையும் வாசித்திருக்கிறேன்.

முலை யோனி என்று குறுக்கு வெட்டுத்தோற்றத்தில் விமர்சிக்கும் ப்ரியா தம்பி என் படைப்புகளை,  ஒரு கவிதையையாவது படித்திருக்கிறாரா, அவர் தீம்தரிகிடவிற்கு வற்புறுத்தி படைப்புகள் வாங்கப்படும் ஆளுமையாக அப்பொழுது இருந்திருக்கலாம், வசுமித்ர -வாகிய நான் இப்பொழுது திமிரோடு கூறுகிறேன், எவர் நட்பையும் பயன்படுத்தி நான் என் படைப்புகளை சிற்றிதழ்களுக்கு அனுப்பியதில்லை. அனுப்பவும் போவதில்லை. என் கவிதைகளை வெளியிடும் பதிப்பகம் உட்பட என் தேர்வு மட்டுமே.

அடுத்தவரின் பாலுறவை விமர்சிக்க தனது நட்பை மட்டும் உத்தமம் என எழுதத் தெரிந்ததைத்தான் பாஸ்...எழுத்துத்திறமையை வீணடிக்காமல் எழுது என்கிறாரா, இல்லை ப்ரியா தம்பி மட்டும்தான் இவ்வுலத்தில் ஆண் பெண் நட்பிற்கான இறுதி அட்டவணையை தயாரித்துக் கொடுத்த பெருந்தகையா. நீங்களும் நானும் பாஸ்கர் சக்தியும் கூட ப்ரியாவின் வீட்டுக்குச் சென்றிருக்கிறோம். அப்போது இந்த வசுமித்ர விடம் முலை யோனி போன்ற வார்த்தைகளின் கிளு கிளுப்பைத் தாண்டியவனாக இருந்து தொலைத்திருக்கிறேன்.

என்ன மஹி இது, இவ்வெழுத்துக்களை அ.மார்க்ஸ், ஷோபா சக்தி, லீனா மணிமேகலையின் அந்தரங்க அவதூறுகளை முகப்புத்தகத்தில் வைத்த, இவர்களின் எழுத்தை வாசிக்காத நபர்களை நான் வரவேற்கப்போவதில்லை, (அப்படியானால் பாஸ்கர் சக்தி மார்க்சின் ஒரு படைப்பைக் கூட படிக்காமல் இருந்திருக்கிறார்!. ) பாஸ்கர் சக்தி என்னிடம் அ.மார்க்ஸ் பற்றிப் பேசியது எல்லாம் எதன் அர்த்தத்தில் புரிந்துகொள்ள. ப்ரியா தம்பியின்  எழுத்துத் திறமையை விணடிக்காமல் எழுது என்று சொல்கிறாரென்றால், அவ்வெழுத்துத் திறமையை, ப்ரியா தம்பின்  படைப்புகளை தீமதரிகிடவிற்காக  அவரிடம் வாங்கிய கட்டுரைகளில் உள்ள வரிகளின் மூலமாக பாஸ் அறிந்திருக்கிறார். இன்று வரை அதை ஆசிர்வதிக்கிறார். அந்த எழுத்துத் திறமையை விளக்கினால் நான் ப்ரியா தம்பியின் கட்டுரைகளை தொடர்ந்து வாசிப்பேன் மஹி.

பாலியல் வார்த்தைகளை இலக்கியத்தில் சேர்க்கலாமா என்றால் நான் என் நெஞ்சு கூசாமல் மண்டையை ஆட்டுவேன், களத்திற்கான பொருத்தப்பாடு என்பேன்.  ஆனால், அதை வசைகளுக்கும், அவதூறுகளுக்கும் மட்டுமே பொருத்தமான வார்த்தைகள் என்று ப்ரியாதம்பி, அவரை ஊக்குவித்த நம் நண்பர் பாஸ்கர் சக்தியும் கருதுவார்கள் என்றால், அதை மேட்டுகுடிகளின் நற்பண்புகள் மட்டுமே, என்று கூறுவதோடு எனக்கு மேட்டுகுடியோ, உயர்குடிப் பிறப்போ வாய்க்காமல் போனதற்கு மகிழ்ச்சியடைகிறேன்.

நான் என்ன செய்யமுடியும் சொல்லுங்கள்.

அதே காதலுடன் வசுமித்ர.

சிறு குறிப்பு;
புத்தனின் மதுக்குடுவையைத் தொடர்ந்து எழுதுகிறேன். நான் அதைக் கைவிட்டாலும், அது என்னைக் கைவிடப்போவதில்லை. புத்தம் சரணம் கச்சாமி.

1 comment:

  1. வணக்கம். வசு, நீயும் ஜெயமோகன் போல நீளமாக எழுத ஆரம்பித்துவிட்டாய் என்று நினைக்கிறேன்... உன் கவிதைகள் அதை உறுதிப்படுத்துகின்றன !
    ****
    எனது ஆங்கில வரிகள் அதே உரப்போடு மொழிபெயர்க்கப்பட்டுளது. நன்றி.
    ****
    சில நேரங்களில் உனது விமர்சன பதிவுகளைப் படிக்கும்போது எனக்கு வியப்பும் பொறாமையாகவும் கூட இருக்கும். ஆனால் பெரும்பாலும் எனக்கு இப்படிப்பட்ட அவதூறு பதிவுகளுக்கு எதிர்வினை செய்வது பெரும் அலுப்பான விடயமாகவே இருக்கிறது. எனக்கென தனிப்பட்ட அனுபவம் இதில் எதுவும் இல்லையென்றாலும் பதிவுலகில் தரம் குறைந்த அரசியலாகவும் அதன் மூலம் கிடைக்கும் விளம்பரதிற்காகவும் பதிவுறும் இது போன்ற பதிவுகளை பார்க்ககூட எனக்கு விருப்பமில்லை. அதே சமயத்தில் நண்பர்களின் அனுபவத்தில் இது போன்ற நிகழ்வு நடைபெறும்போது எனக்கு ஒரு அவமான உணர்வை அளிக்கிறது. புனைவிலக்கியம், இலக்கிய விமர்சனம் மற்றும் கட்டுரைகள் மீதான எதிர்வினைகள் மட்டுமே இப்போதைய அல்லது எப்போதைக்குமான தேவையாக இருக்கிறது. ஷோபாவின் மீதான அவதூறுகளை கடுமையாக விமர்சனம் செய்தது சரியானது. (அதற்கான நீண்ட நீண்ட விளக்கங்களை ஷோபாவிடம் நான் எதிர்பார்கவில்லை!) ஆனால் பாஸ்கர் சக்தியின் கடிதத்திற்கான எதிர்வினை தேவையற்றது - அவரிடம் நீ எழுப்பிய கேள்விகள் நியாயமாய் இருக்கிறது .. இருந்தாலும் - ஏனென்றால் இது போன்ற கடிதப்பரிமாற்றங்கள் அது பொதுவில் வைக்கப்பட்டாலும் சில தனிப்பட்ட அனுபவங்கள் அதில் பொதிந்திருக்கும் என்பதை நான் கருத்தில் கொள்கிறேன். இது போன்ற உணர்வுபரிமாற்றதில் நீயும் சொன்னது போல ஏதாவது ஒரு எதிர்பார்ப்புகள் அவர்களுக்குள் தெரிந்தோ தெரியாமலோ இருக்கலாம்.. அல்லது கடிதம் எழுதப்படுகிற நேரத்திலான மனநிலை ஒன்று இருக்கிறது.. சில நேரம் அது சில உண்மைகளை எழுதுகிறவர்கள் அறியாமல் வெளிகொண்டுவந்துவிடும்..அது போன்ற சில உணர்வுகளை நான் உணரும்போது அதை சிதைத்துவிடக் கூடாது என்று எண்ணுகிறேன். இது போன்ற கருத்துப்பரிமாற்றங்களில் கொஞ்சம் சிவப்பு கொஞ்சம் மஞ்சள் கொஞ்சம் நீளம் கொஞ்சம் பச்சை வர்ணங்களை நான் உணர்கிறேன் .. அது பகிங்கரப்படுத்தப்படும்போது முழுதும் கருப்பு நிறமாகி விடுகிறது. அதனால் எதுவும் பயனில்லை மட்டுமல்லாமல் பொது கருத்துவிரோதம் தவிர்த்து தனிப்பட்ட குரோதத்திற்கு இது வழிவகுக்கும்.
    **********
    மார்க்ஸை பாஸ் படிக்கவில்லை. பாஸை ப்ரியா படித்ததில்லை. மூன்றையும் நீ படிக்கிறாய். ப்ரியா மார்க்ஸை ரெண்டு பொண்டாட்டி காரர் என்றும் பாஸை உன்னத மனிதர் என்றும் உன்னை யோனி மற்றும் முலைகளால் கிளர்ச்சியுருபவன் என்றும் விமர்சிக்கிறார்.. அது உண்மையாகவே இருந்துவிட்டு போகட்டுமே.. தனிப்பட்ட பெண்ணுக்கு எவ்வகையிலும் தொந்தரவு தராமல் இருந்தால் எதிர்பாலுறுப்புகளின் மீதான கிளர்வு எந்த குற்றத்திற்கும் உட்படாதது என்பதை ப்ரியா தம்பி நன்கு அறிவார். அவர் புத்தகம் எழுதட்டும் பாஸ்கர் சக்திக்கு சமர்பிக்கட்டும் அதற்கப்புறம் வைத்துக்கொள்வோம் கச்சேரியை - அந்த விமர்சனமும் எள்ளல் தொனியில்தான் இருக்கும் - அதுவரை சாத்தியப்பாடுகளுக்கு வழிவிடுவோம் என்பதுதான் என் எண்ணம்.
    *******
    உன் மீதான எனது விமர்சனம் என்னவென்றால், நான் கம்பு .. நெட்டுக்கதான் நிற்பேன் .. எனும் உன் எழுதுதொனியை மாற்றலாம் என்பதுதான். அவ்வளவே.
    *****
    இது போன்ற உனது எதிர்வினைகள் மற்றும் எழுதுதொனி உன் மனம் சரியென்று சொல்லும் வரை மாறப்போவதில்லை என அறிந்ததுதான். வாழ்த்துக்கள். நன்றி.
    *************

    ReplyDelete