Thursday, September 28, 2017

அம்மா நான் யார்?


I


அம்மா நான் எனது சதையை பிய்த்துத் தின்னட்டுமா
இல்லை மகளே இது தேசத்தின் உப்பு
நாம் டாட்டாவுக்கு விசுவாசமாய் இருக்க வேண்டும்

அம்மா வயிற்றில் மிருகம் இருக்கிறதா
ஆம் மகளே அதன் பெயர் பசி

அம்மா
தாகமாயிருக்கிறது
எனது மார்பில் கீறி
உதிரமொரு துளி அருந்தட்டுமா

இல்லை மகளே
அஃது
அம்பானியுடையது
அவர் பலி ஏற்கும் கடவுள்

அம்மா நாம் உயிர் வாழவேண்டுமா
ஆம் மகளே
நாம் இந்த தேசத்தின் சொத்து
அம்மா நாம் அடிமையா
ஆம் மகளே
நாம் பிரதமரின் செல்லக் குழந்தைகள்


                                                                    ii
அம்மா நான் யார்
நீ
இந்த தேசத்தின் சொத்து மகளே

பசிக்கிறது அம்மா
கேட்காதே தேசத்திடம்

தவிக்கிறது அம்மா
தேசத்திடம் கேட்காதே

அம்மா நான் செத்து விடுவேனம்மா
வேண்டாம் மகளே
உயிரைக் கையில் பிடித்துக்கொள்
அடிமைகள் தற்கொலை செய்து கொள்ள அனுமதியில்லை

என்னதான் அம்மா நான் செய்யவேண்டும்
நீ வளர்ந்து பெரியவளாகும் போது
உன் பிள்ளைக்குக் கதைச் சொல்

என்ன கதை அம்மா
அதுதான் மகளே
நம் கதையை
கதையில் உனது பெயர் என்ன அம்மா
என் பெயர் அடிமை மகளே
நம்மைக் கொல்லும் பூதத்தின் பெயர் என்ன அம்மா
அதை

பிரதமரிடம் கேள்

பசித்திரு


எனது தனிமையில்
அரசு மூத்திரம் பெய்கிறது

ஆதார் அட்டையுடன்
நான் கல்லறைக்குச் செல்கிறேன்

திருவாளர் மோடி
நீங்கள் உங்களது ஆதார் அட்டையை
வெளிநாடுகளுக்கு அடகுவைக்கும் போது
முதலாளிகளின் கடன் அட்டை
தூக்குக் கயிரைப் போல் தொங்குவதேன்

நான் செத்துக்கொண்டிருக்கிறேன்
தயவு செய்து
தேசிய கீதத்தை இசைக்கத் தொடங்காதீர்கள்
கேட்க அப்ஸ்வரமாக இருக்கிறது

காந்தி என்கிற கிழவனைச் சுட்டுக்கொன்ற
தோட்டாவின் ஒலி
ஹேராம் என ஒலிக்கிறது

துரதிருஷ்டவசமாக
கம்யூனிஸ்டுகள் உறங்கும் பொழுது
நீங்கள் பன்னாட்டு நடனம் ஆடிவிடுகிறீர்கள்
முதலாளிகள் அதை
இந்திய காபரே என்கிறார்கள்

துயரத்தோடு சொல்கிறேன்
அந்நிய தேசத்தில் நீங்கள் முஷ்டியை உயர்த்திக் காட்டும் பொழுது
எனது கோமணத்தை
நான் இறுகப் பிடித்துக் கொள்ள வேண்டியதாயிருக்கிறது

இந்த அச்சத்தை நொடிக்கொருதரம் நீங்கள் தரும்போது
மாற்றுக் கோமணம் குறித்து நான் சிந்திப்பது
நானே
என்னை வதைப்பது போலிருக்கிறது

கைகோர்த்து ஆடும் அம்பானிகளுக்கு
நீங்கள் எச்சில் வடிய லாலி பாடுவது எனக்குக் கேட்கிறது

பத்திரிக்கைகள்
அதை பொருளாதார முன்னேற்றம் எனும் போது
நான் பிச்சை எடுத்துக் கொண்டிருக்கிறேன்

ஒரு குடிமகன் பிச்சை கேட்கும்போது
தேசமே பிச்சையெடுக்கிறது

ஞாபகத்தில் வைத்துக்கொள்ளுங்கள்

எல்லோரும் பிச்சை எடுக்கும் தேசத்தில்
நீங்கள் பிரதமராயிருக்கிறீர்கள்

பிரதான பிச்சைக்காரர்

அயல் நாடுகள் இந்தியாவை
ஒரு திருவோடு போல் வரைந்து வைத்திருக்கிறது

திருவோட்டில் விழும் சில்லறைக்காக
நீங்கள் பிரதமாயிருக்கிறீர்கள்

ஞாபகம் வைத்துக்கொள்ளுங்கள்
பிச்சைக்காரர்களின் தேசம்
பிச்சைக்காரர்களின் பிரதமர்
பிச்சைக்காரர்களின் இந்தியா

இந்த உலகில்
எண்பது கோடிப் பேருக்கு
இரண்டு வேளை உணவும் உத்தரவாதமில்லை
பிடல்
உரத்துக்கூவும் போது
இந்தியா மட்டும் தலை குனிகிறது

பிச்சைக்காரர்களின் தேசிய கீதம்
பசி
பசி
பசி
பசி…


Saturday, September 16, 2017

விஷம்



எனது தனிமை விஷம்
அருந்தி மகிழுங்கள்
ஆண்டவரே

பொல்லாப்புக்கு ஆக்கினையாக்கி
துரோகத்தால் வாழச்சொல்லும் உங்கள் கருணைக்கு அய்யோ பாவம்

ஆண்டவரே
நான் மனிதன்
இது உங்களை மீறிய
செயல்
சொல்
வாழ்க்கை

ஏன் ஆண்டவரே
எங்களை வழிமறிக்கிறீர்கள்

கடவுள்களால் ஆன சாபங்களால்
எங்கள் தேசம் நிரம்பி வழிகிறது
சாலைப் போக்குவரத்தில் நீங்கள் எந்தக் குறியை
மதிக்கிறீர்கள்

பச்சையையா
இல்லை
மஞ்சளையா
தவிர்க்கமுடியாமல் 
சிவப்பையா

எங்கள் தேசத்தில்
ஆளுக்கொரு நிறம்
ஆளுக்கொரு கடவுள்
ஆண்டவரே

ஆளும் அதிபர்
முன் நீங்கள் நின்றால்
அவர் தானே கைகட்டி
ஒரு கம்பெனியும் வைத்துத் தருவார் ஆண்டவரே

வாங்கிப் பிழைத்துக்கொள்ளுங்கள்
கொல்லுங்கள்

எங்கள் தேசம் ஏழைகளின் தேசம்
சிரிப்பில் இறைவனைக் கண்டும்
அழும்போது
புரட்சியாளர்களையும் துணைக்கு அழைக்கிறோம்

நல்லது ஆண்டவரே
இது வழிப்போக்கனின் சொல்
மதிக்க வேண்டாம்

நிச்சயம்
நீங்கள் எங்கள் வழிக்கு வரும்போது
முதலாளிகளுக்கு எதிராய் நிற்பீர்கள்
அப்போது ஆண்டவரே நீங்கள் என்னை மன்னிக்க வேண்டும்

ஆண்டவர்களைத் தோழர்களாய் அழைப்பது என்பது
அவமானத்திற்குரிய செயல் அல்ல

தோழர்கள்
ஆண்டவர்களை ஆதி முதலே அடையாளம் காட்டி வந்தார்கள்
நாங்கள்தான் ஏமாந்து போனோம்

ஆண்டவர்கள் அனைவரும் அதிகார வர்க்கத்தினர்
என்கிறார்கள்
கம்யூனிச பூதத்தை 
உசுப்பி விட்ட இரு இளைஞர்கள்

ஆண்டவரே
இப்பொழுது எங்களுக்கு துணைக்கிருப்பது
அந்த இரு சின்னஞ்சிறிய பூதங்கள்தான்

மன்னியுங்கள் ஆண்டவரே
மனிதர்களை அரவணைக்கும்
தோழர்களை பூதம் என்றழைப்பதற்கும்
எதுவுமே செய்யாத
உங்ககளை ஆண்டவரே என்றழைப்பதற்கும்
சற்றுக் கூச்சமாக இருக்கிறது

தயவு செய்யுங்கள் ஆண்டவரே
இப்பொழுது உங்களைப் பார்க்கத்தான்
பயமாய் இருக்கிறது

எங்கள் அதிபர்
முதலாளிகளை ஆண்டவர் என்கிறார்
முதலாளிகளின் சிரிப்பில்
ஆண்டவர் தங்கப்பல் தெறிக்க மின்னுகிறார்


நாங்கள்
அமைதியாய் இருக்கிறோம்

பசித்த வயிறு
தீயாய்
எரிகிறது.






வேட்டுவம் நூறு- நூல் விமர்சனம்- வசுமித்ர

    பாட்டுக்களின் தாய் , நமது விதை முழுவதின் தாய் , ஆரம்பத்தில் நம்மைப் பெற்றெடுத்தாள்.  அவள் எல்லா இன மனிதர்களின்,  எல்லாக் குலங்களின் தாய்...